Un obradoiro de vasoiras naturais para descubrir a verdadeira historia do Samaín
O alumnado de 3º a 6º de Primaria elaborou vasoiras con elementos vexetais mentres afondaba no papel histórico das menciñeiras medievais.
Con motivo da celebración do Samaín e en conexión co proxecto sobre a Idade Media que se desenvolve no centro, as nenas e nenos de 3º a 6º de Educación Primaria participaron nun obradoiro de vasoiras naturais cheo de aprendizaxe e creatividade.
Durante a sesión, as rapazas e rapaces traballaron con diferentes elementos recollidos da contorna como paus, xestas, elementos vexetais e cordas para dar forma ás súas propias pezas artesanais de xeito cooperativo.
Esta proposta serviu tamén para reflexionar sobre o tópico tradicional das bruxas e as vasoiras. Explicouse que aquelas mulleres eran en realidade curandeiras e menciñeiras que posuían amplos coñecementos sobre plantas e follas para axudar a sandar doenzas e coidar da súa comunidade.
Segundo se transmitiu na actividade, estas persoas adoitaban colocar unha vasoira na porta das súas vivendas como sinal identificativo para que a veciñanza puidese recoñecer onde vivían e acudir na procura de axuda médica ou remedios tradicionais.
