Creatividade monstruosa para preparar o Halloween no CEIP Belesar
O alumnado de 1º a 6º de Primaria une a lingua inglesa e a expresión artística na creación dun gran mural temático. A partir de lecturas terroríficas, nenos e nenas deron forma a personaxes e escenarios cheos de imaxinación.
No CEIP Plurilingüe de Belesar xa se respira o misterio coa preparación da chegada de Halloween. Todo o alumnado, dende 1º ata 6º de Educación Primaria, sumouse a unha motivadora proposta conxunta desenvolvida a través das materias de Inglés e Arts.
A actividade tivo como punto de partida a lectura e o traballo arredor de varios contos en lingua inglesa, entre eles Ten Little Monsters, Pretty e historias con personaxes como Edwin Page. A través destas lecturas, as nenas e nenos achegáronse ás tradicións desta celebración combinando a aprendizaxe lingüística coa dinamización lectora.
A partir deses relatos, o alumnado puxo mans á obra para deseñar os seus propios little monsters, tumbas, personaxes de bruxas e unha gran mansión misteriosa. No proceso empregáronse diferentes técnicas plásticas de debuxo, coloreado e recorte que permitiron que cada creación fose única.
Todo este esforzo colectivo culminou na montaxe dun vistoso e terrorífico mural escolar que decora o colexio. O proxecto pechouse cun balance cheo de creatividade, imaxinación e un gran entusiasmo por parte de todos os cursos participantes.
