Con ollos de naturalistas: 3º de Primaria investiga as bolboretas
O alumnado de terceiro de Primaria explorou a contorna do colexio na procura de ovos e eirugas, dando comezo a unha fascinante experiencia científica.
O alumnado de terceiro de Educación Primaria transformouse por un día nun auténtico equipo de naturalistas grazas a unha investigación científica moi especial. A rapazada saíu á contorna do noso colexio co obxectivo de buscar ovos e eirugas de bolboreta, aprendendo a mirar a natureza con outros ollos.
Para levar a cabo esta misión, as nenas e nenos equipáronse con guías de campo, lapis e táboas de rexistro. Durante o percorrido, puxeron moita atención ao observar talos e follas, aprendendo a recoñecer as plantas das que se alimentan estes lepidópteros e tendo sempre o máximo coidado para actuar sen danar o medio.
A aventura non rematou fóra, senón que continuou dentro da aula coa observación dunha eiruga que atoparon. Alí mesmo puxeron en marcha a preparación do mariposario, un espazo axeitado que lles permitirá seguir de preto a evolución deste ser vivo.
Esta actividade serve para fomentar a curiosidade científica, ademais de traballar valores tan esenciais como a paciencia e a responsabilidade que require coidar e respectar os seres vivos que nos rodean.
